الأنشطة - مسابقة الانشطة الكنسية - مسرحيه ملك العرايس

مسرحيه ملك العرايس
( يفتح المسرح على واحد يرسم وواحدة تغنى ثم يدخل الولد والبنت وتنفذ
حركات صامته وينزلو من المدينة إلى مدينه الشر الولد يذهب للرسام والبنت
إلى المغنية وتظهر الفرحة عليهم ويذهبان تجاه بعضهما البعض ويوقفهم
الأم من المدينة )
الأم يا اولادى انتو فين يا اولادى ...أه يا حرقه قلبي عليكوا ....... أبنى
تاه ماشفتهوش ...أبنى ملامحه من ملامحي ...شكله ذي وأنت يا
خويا ماشفتش بنتي ...أوصافها معروفه يمكن ذي أوصاف أخوها
تمام ... ملامحها من ملامحي...محدش شافهم حد يرد عليا ..حد يبرد
قلبي... دا أنا دايما محوطاهم ...دا أنا دايما بوصيهم...دا أنا دايما
بوعيهم...مش عارفه ازاى تاهو منى أه يا حرقه قلبي عليهم......
أه يا اولادى .
أبو طبله يا اهالى مدينه النور...يا اهالى المدينة الكرام ...يأمر ملك الملوك
...ملكنا المحبوب ...راعى وحامى المدينة..... قالي أنا الراجل الحلو
الطيب الحلو اللذيذ عمكم أبو طبله...أنبهكم أن ممكن يكون فيه حرب
بسبب انتصار ملكنا في الحرب اللي فاتت... في أعداء كتير متربصين
بالمدينة يارب استر كلمه ها قولها واللي ليه ودنين للسمع يسمعني
...الحقوا المدينة وسدوا أبوابها.....وأوعوا حد يتساهل ....لنروح
كلنا في داهية ..... واللي ليه ودنين للسمع يسمعني ( ويعيــــــــــد )
( ستــــــــــــــــــــــــــــــار)
________________________________________
(تفتح الستار على الولد والبنت )
الولد الله الصبح طلع .... صباح الخير يا أختي
البنت صباح الخير يا خويا ... صوت العصافير جميل قوى
الولد شوفي... شوفي النور اللى جاى من عند الملك


البنت طبعا نور المدينة كله بيجى من عند الملك
الولد تعرفي يا اختى ... دا أنا حلمت حلم حلو قوى امبارح... حلمت أنى بقيت
رسام كبير وبرسم صور كتير وكل الناس كانت بتتفرج عليا وأنت
كنتى جايه من بعيد ومبسوطة وقلتيلى وأنت بتضحكى..مبروك يا
اخويا...بس يا خسارة محدش كان بيشترى منى.
البنت حلمك حلو قوى... مش مهم حد يشترى منك ..أنت فعلا بترسم كويس
وأنا برده حلمت حلم حلو قوى ...ممكن احكهولك .
الولد أه ..... طبعا .
البنت بص يا سيدي .. أنا حلمت أنى كنت واقفة على مسرح كبير وبرنم
ترنيمه حلوه خالص وأنت جيت واديتنى ميكرفون حلو بشكل وفيه
ألوان كتير وقلتلى يالا يا اختى ..رنمى ..رنمى ... هو أنت صحيح كنت
بتتكلم معايا جامد ليه .
الولد عشان أحمسك بس....يالا ... رنمى ...اووو قصدي كملي
البنت فضلت ارنم ارنم ولما جيت اقرب الميكرفون لقيته طعمه حلو قوى .
الولد الميكرفون .
البنت لا يا آخى .
الولد أمال إيه .
البنت هو أنا مقلتلكش .
الولد مقلتليش إيه .
البنت انه مطلعش ميكرفون .
الولد اخص عليكى ...كل ده وأنت بتضحكى عليا ... أنا زعلان منك
البنت لا متزعلش منى ...أصله فعلا مطلعش ميكرفون ....طلع ايس كريم .
الولد حلمك طعمه حلو قوى .... أنا بحب المنجا قوى .
البنت إيه دا ... عروسه حلوه قوى ...بس كبيرة قوى ... اخويا بسيط ...اخويا
بسيط أنا لقيت عروسه .
الولد وأنا كمان لقيت عروسه ... إيه دا عروستك اكبر من عروستى وكمان
أحلى من عروستى ...أنا مليش دعوه ... العروسه دي مش حلوه ....
أنا مش عايز العروسه دي (يرمى العروسه) .
البنت ليه رميت عروستك يا بسيط .
الولد دي مش عروستى .... هي دي عروستى (يمسك عروستها )
البنت لا دي عروستى
الولد لا دي عروستى
البنت لا دي عروستى
الولد متشديش .
البنت متشدش أنت ( تقع العروسه على الأرض )
الولد العروسه وقعت تحت .. أنا مخاصمك ( تعيط البنت ) خلاص متزعليش منى..
أنا بس كنت عايز العب معاكى بيها ... انا متاسف متزعليش
البنت انا اللى متاسفه ...انا اللى ما كنتش عايزه اللعبك بيها معايا بيها .
الولد احنا الاتنين غلطنا ... وانا كمان اوعدك مش هعمل كده تانى
( تحدث دربكه حيث تتحرك العروسه وتخلع الوش اللى لبساه )
البنت ايه دا يا ماما... يا ماما العروسه بتتحرك .
الولد متخفيش يا اختى ... معاكى راجل ( يختبئ خلفها )
البائع ايه ده حرام عليكوا ... صحتونى من النوم ... وكسرتوا عظمى ... حرام
عليكوا .
الولد سبحان الله راجل جوه عروسه ... دخل ازاى دا
البنت راجل ليه عنين ومناخير وبق
الولد الله دا ليه ودنين
البائع ايه العيال العبيطه دى... امال فين الواد مرقص
الولد مرقص مين
البائع مرقص الصبى بتاعى
البنت يعنى ايه صبى .... مرقص دا زينا ليه ودنين ومناخير وبق .
البائع احنا رجعنا للعبط من تانى .... اوعوا تكونوا عملتوا فيه حاجه .
البنت لا صدقنى يا عمو احنا حتى ماشفنهوش
البائع امال راح فين بس ( يدور عليه فيجد العروسه التانيه ) نايم انت على طول
نايم .... اصحى يا ابنى .
(يبداء يصحى ويتحرك من العروسه )
البنت دا طلع من العروسه تانى زيه .
الولد قولى يا عمو انتوا كنتم بتعملوا ايه جوه العرايس
البنت اكيد كانوا نايمين يا عبيط .
البائع لا احنا ماكناش نايمين ..... احنا شغلتنا كده .
الولد وأنت شغلتك ايه يا عمو
البائع انا شغلتى بسيطه وحلوه خالص ...... انا ببيع واشترى اللعب والعرايس ....
انا ملك العرايس .... مرقص دا بقى الصبى بتاعى ... انا صاحب اللعب انا
بتاع السكسونيا .... معايا احلى اللعب والعرايس ..... دى حقيقه مش
هجايس .... اى شئ قديم .... هاخدوا منكم بحاجه على الموضه .... معايا
احلى الهدايا للشاب ... والاموره معايا احمر واخضر..الوان تخلى الوحشه
سنيوره .... محدش من البنات قال هات ....جرابى مليان حجات ومحتاجات
خد فكره واشترى بكره .... اتفرج وفكر براحتك ...ولما تنوى انا فى الخدمه
حجات قديمه اخدها واديلك الجديد.... محدش هيشترى ... محدش قال هات
معايا حجات للناس اللى ممكن يورثوا العرش ...للناس الغاليه مش اللى
يساوى قرش.....وده كله حقيقه وما فيش غش...اه خد بايدى يا ابنى
مرقص اخد بايدك ده ايه ... ما انت صحتك زى البمب ونظرك 6 ع 6.
البائع هس .... اسكت ... لحد يسمعك دى اول الشغلانه لازم تعمل كده .
مرقص ليـــــــــــــه بقى لازم ؟؟
البائع ايه جرى ايه ...لغايه دلوقتى مش عايز تتعلم ...لازم تستعطف الناس .....
ولما تبتدى عواطفهم تتحرك ناحيتك ...تجرى تبيع وتشترى..ايوه يا حلوه
بتشاوريلى .
مرقص حلوه ايه محدش عبرك ولا بص ناحيتك .
البائع أش فهمك انت ... فى واحده وواحد ابتدوا يفكروا وهيشتروا .
مرقص انا مش شايف لا واحد ولا واحده
البائع استنى وانا هوريك ... يلا يا ابنى تعالا نمشى ... اظاهر مالناش عيش فى
البلد دى .
الاخوه استنى يا عم يا بتاع العرايس .
البائع مش قولتلك ايوه جاى ... ايوه جاى معايا كل اللى انتوا محتاجينوا تعالوا
وانا اوريكوا
البنت ايوه بس امى ما علمتنيش اخرج بره مدينتى .
الولد والملك بتاعنا ... نبه علينا ان اللى هيخرج هيضيع .
البائع ده بس بيقلكوا كده ... عشان متشفوش المدن الاجمل والاحسن ...وتسيبوا
مدينته وتمشوا ..... تعالوا وانا هاوريكوا اللى عمركوا ماشفتهوش .
البنت لا انا خايفه .......... امشى .
الولد وانا كمان خايف ........ امشى بعيد .
البائع امشى دا ايه .... انا عايز ادخل .
الولد تدخل..... تدخل ايه .
البائع انتوا شايفنى .. انا راجل غلبان وبتعكز على الاغلب منى ولا انا ماسك
مسدس ولا معايا سكينه .
البنت عندك حق ... ماما علمتنا
الولد منظنش السوء بحد ... تعالى ( يبداء البائع يطلع السلم )
الام يا بنت يا ولد ... انتوا روحتوا فين ... غلبتونى ... مستخبين منى فين ....
يا ربى...تعالوا البسوا الهدوم التقيله ... النهارده برد ... اقفل الشباك يا واد
واقفلى الباب يا بنت .
البائع دى ميــــــــن !!
الاخوه دى امنا .... على طول كده خايفه علينا .
ابو طبله يا اهالى مدينه النور .
البائع ومين ده كمان .
الاخوه ده ابو طبله .
ابو طبله يا اهالى مدينه النور ... يا اهالى المدينه الكرام ... ملك المدينه كان عارف
ان فى حرب ... علشان كده قرر ان يحصنها كويس ... بنى اسوارها
بالاحجار الكريمه .... وامر انه يبقى لكل واحد سيف .... سيف علشان
يحارب بيه ... واللى عايز يبقى من جنود الملك .... يروح ويستلم سيفه .
البائع وايه الحرب اللى بيقول عليها دى ... وهو فى ناس فى المدينه بتعرف
تحارب .
الولد فى ناس اتعلمت الحرب فى مدرسه الملك وناس لسه هيتعلموا .
البائع اظاهر ان الكل لسه هيتعلم ... بقول ايه ... تعالى هاوريك لعبى وعرايسى
وانا واثق انها هتعجبك .
مرقص انت اسمك ايه .
البنت انا اسمى بسيطه
مرقص بسيطه ... بسيطه .
البنت ايوه انا اسمى بسيطه .
مرقص بسيطه انا عايز اسالك سؤال .
البنت أتفضل .
مرقص هي المدينة دى متغيرش فيها حاجه من ساعه ما أساسها الملك .
البنت ابدا ... المدينه زى ما هى من ساعه ما اساسها الملك .
البائع ايه ... مكنتم تجددوها ... ولا اقلكوا انتوا اهدموها وانا ابنيهالكم .
البنت لا ... ابدا ...دا هما شويه تراب ويتنفضوا وترجع المدينه زى الاول .
مرقص على فكره ... انا من ساعه ما دخلت المدينه ... مش شايف ولا لمبه واحده
هو برده النور بيجى من عند الملك .
البنت ايوه نور المدينه كله ..... بيجى من عند الملك بتاعنا .
البائع هو الملك بتاعكوا بيخلى كل حاجه فى ايده عشان يتحكم فيكوا .
البنت غريبه .. انا اول مره اسمع الكلام دا عن الملك بتاعنا .
البائع بس صح .
الولد لا مش صح .. ومش هسمحلك تتكلم كده عن الملك بتاعنا .
مرقص بس دى هاديه قوى .
الولد انتوا هتسكتوا ولا تخرجوا من المدينه .
البائع بس ... بس اسكت .. انت هتبوظلنا البيعه .
البنت اقولك ايه انت مش هتورينا اللى عندك .
البائع طبعا هوريكوا ... بس قبل ما اوريكوا .... هتدفعوا كام .
الولد مش انت قلت باى حاجه قديمه .
البائع طبعا انا مبحش غير القديم .
الاخوه ( ينظر الولد والبنت لبعضهم ) ... موافقين بس ورينا اللى معاك .
البائع هات يلا بسرعه (لمرقص .. يفتح مرقص الكيس ويطلع فستان ) .
البائع أيـــــه رايك فى الفستان .
البنت الله دا جميل قوى هيبقى حلو عليا .
البائع طبعا هيبقى حلو عليكى .... دا مقاسك بالظبط .
البنت بس دا شكله غالى قوى .
البائع لا غالى ولا حاجه ... وعشان اول مره .. انا ممكن ادهولك واخد توبك
القديم وانت خدى الفستان الغالى دا .
البنت توبى ؟؟؟؟
البائع دا رخيص وقديم ...( البنت تفكر ) هتخديه ولا ..لا .
البنت هاخده .
الولد وانا ممكن حاجه ليا .
البائع أنا معايا من كل صنف ومن كل نوع ... وانت بالذات ليك معايا هديه .
الولد أيــــــــه هى ( بفرح ) .
البائع ادى يا عم هديتك ( يخرج قطعه قماش بيضاء ويعطيها له ) .
الولد هديتك ليا .... حته قماش ( بحزن ) .
البائع دى مش حته قماش ... دا قماش مخصوص من اللى بترسم عليه .
الولد الله ... انا كان نفسى من زمان ارسم على لوحه غاليه زى كده هاتها بقى .
البائع ( يسحبها منه ) .... هتخدها كده ببلاش .
الولد وانت عايز ايه .
البائع توبك القديم الرخيص ... قدام اللوحه الجديده الغاليه ( يعطى له التوب ) .
( يمش الاخين منبهرين بالهدايا ولكن يقف قصادهم البائع )
البائع استنوا انتو رايحين فين .... انتوا لسه ليكوا عندى حاجات ولعب كتير .
البنت عندك حاجات تانى .
البائع انا جرابى ما بيخلصش ... شوفى مثلا اللعبه دى ( يخرج ميكرفون ) .
البنت ايه دا .
الولد الايس كريم .
البائع لا وانت الصادق ... دا ميكرفون اللى هتغنى بيه اختك ... هتبقى مشهوره
وتعملى حفلات وشرايط والكل يشاور عليكى ... وانت يا امور عايز هديتك
... هديتك عندى غاليه قوى ( يطلع له فرشه ... تقترب البنت لاخذ
الميكرفون والولد لاخذ الفرشه ) .
البائع والتمن .
الاخوه وايه هو التمن ؟؟
البائع الخشبه .... الخشبه !!!
الولد دى هديه الملك لينا .
البائع بذمتك بتسمى حته الخشبه دى هديه ( يخرج العقد ) .
البنت الله ( وتمد ايديها ) .
البائع وهتدينى الخشبه .
البنت وهتدينى العقد .
البائع كله ... كله .... بحته الخشبه .
البنت خلاص انا موافقه ( تبداء فى خلع الخشبه ثم يخطتفها البائع بسرعه ) .
البائع وأنت مش هتدينى الخشبه ( ويطلعله الخاتم ) .
الولد وانا كمان موافق ( ويبادله ) .
مرقص الكلام دا انا سمعته قبل كده ( ينظر للبائع ) .
البائع على فكره انا نسيت اقولكوا ان الحاجات دى ملهاش لازمه فى مملكتكوا
البنت قصدك ايه .
البائع الكل مين هيسمعك لما تغنى وانت مين هيشوف لوحاتك فى المملكه دى ...
هنا الكل مشغول .
الاخوه قصدك ايه .
البائع قصدى تطلعوا من هنا وتيجوا معايا .
البنت وامنا .
الولد وملكنا ... دا قال متطلعوش بره واللى هيطلعوا هيضيعوا .
البنت اللى هيطلع هيضيع .
البائع كلام .........
الولد بس دا كلام ملكنا .
البائع الكلام ... ولا الشهره والمعارض والفلوس
امكوا ..ولا الفستان والعقد والغنى .
مرقص انت ناوى تعمل معاهم ايه ( ينظر له بجانب عينه ) .
البائع يلا بينا يا حلوين .
مرقص لا يا بسيطه .... لا يا بسيط ... ارجعوا هيحصلكوا ذى اللى حصلى .
البائع انت جرالك ايه يا مرقص ... اسكت ... تعالوا (2) .
البنت ملكنا ... وامى ... وتوبى .
البائع توبى اجمل من توبك .
الولد مش هنقدر نعدى .
البائع هاتوا ايديكم ... هاتوا ( يصعدوا على السلالم وينزلون من المدينه الى
مدينه الشر )
الام (صوت) انت يا بنت .. انت يا واد ... هفضل طول اليوم انادى عليكوا ....
ايه الصوت دا وايه البرد والهوا دول ... اوعوا تنسوا معادكم مع الملك
( تدخل ) يا بسيط .. يا بسيطه ... مين اللى فتح الباب
ولادى انتوا روحتوا فين فتحتوا الباب ليه .
ولادى انتوا روحتوا فين فتحتوا الباب ليه .
ايه طلعكوا فى البرد ده ..... نسيتوا معادكم مع الملك انا خايفه تتاخروا
.... من غيرى هتتاخروا .... مين غيرى هتنسوا .... انا لازم ادور عليهم
فى كل حته يا اولادى (2) انتوا فين .... ابنى تاه ماشفتهوش .... بنتى
تاهت ماشفتوهاش ولادى ..... ولادى ..... ولادى تاهوا .

(( ستـــــــــــــــــــــار ))
(يدخلون ثلاث شخصيات)
الاول يا زهور ضاعت قبل ما تشم الهوا.
التانى يا قلب مات قبل ما يدوق الدوا .
التالت يا دموع مطر فى شمس وفى عز النهار
الاول قدركم رماكم على المستخبى ورا الجدار
التانى يا ريت تعودوا يا اولاد (2)
التالت يا ريت تعودوا قبل فوات الاوان .
الاول ومن موت الغفله نقوم ومن كفن الصمت نتحرر
التانى ونزيد الخطوه يوم ورا يوم ونعيد الحلم ويتكرر .
التالت ونصحى الماضى ويتحرك ونشوفه بيتكلم فينا .
الاول نقوله هناخد من بحرك صوره نزرعها فى امانينا .
التانى من موت الغفله يلا بينا نقوم ونقيد الروح ونشعلها.
التالت واكفان الصمت تتمزع وبصدق الكلمه نكللها .
التانى دا كل شئ باطل ... باطل وقبض الريح .
والريح طريح عاطل .... عاطل لانه جريح .
التالت قالوا الشيطان شاطر .... يضحك على الغافلين .
ليه نعمله خاطر والحجه ... مش عارفين .
الاول مات فينا حب الله .... مات واحنا مش حاسين .
ليه احنا نعصاه .... ليه للشيطان طايعين .
الجميع ليه احنا نعصاه ... ليه للشيطان طايعين .
( يخرجوا الثلاثه وتفتح الستاره الاماميه على الام )
الام انا ابتديت ادوخ من اللف ... محدش لقى ولادى محدش شافهم ولادى
هاديين عينيهم كانت ناحيه النور اللى جاى من عند الملك كان هو اللى
شاغل بالهم ليل نهار كان دايما يقفوا ويتكلموا معاه اول ما عنيهم اتحولت
عنه أول ما بطلوا يروحوله اتغيروا وبقوا يبصوا على الريح .. الريح اللى
حلت من اسوار المدينه كانوا شويه هوا صغيرين قلت وماله سبتهم مكنتش
اعرف ان العاصفه جايه قويه .. تاهت البنت وتاه الولد (2) راحوا مع
الريح لو شفتوهم قولولهم يخلوا بالهم كويس من نفسهم ... اه يا ولادى
انتوا رحتوا فين يا اولادى .
الزمن الثقب الصغير بيدخل شويه هوا وحجاره المدينه بتقع واحده ورا واحده
سدوا الثقوب وهتلاقوا الحجاره كتيره تسدوا بيها الثقوب اللى فى اسوار
المدينه ... اصحوا واسهروا عدوكم وحش بيتغير بميت شكل وبميت لون
(يدخل مرقص فى زى مذيع)
مرقص والان مع المغنيه المشهوره ... بسيطه .
( تفتح ستار المسرح وتغنى وتتحرك حركات كومديه )
البائع برافوا عليكى يا عروستى .... قصدى يا فنانتى الكبيره .
البنت يعنى عجبتك .
البائع انتى عجبتى كل الناس انتى مش شايفه الناس هتتجنن عليكى ازاى ...
انتى هايله .
(يدخل مرقص)
مرقص الصحافه والتلفزيون بره خاربين الدنيا عايزين يشوفوا فنانتنا الكبيره .
البنت صحافه وتلفزيون علشانى انا .
البائع خليهم يستنوا شويه يا مرقص يظهر ان فنانتنا تعبانه شويه .
البنت لا.لا.لا انا مش تعبانه خليهم يدخلوا .... بس انا خايفه (يخرج مرقص)
البائع خايفه ليه الناس اللى بره دول كويسين وهيعملوا معاكى اكبر لقاء صحفى
اتعمل .
(تدخل المذيعه والصحفيه والمصور)
المذيعه الكاميرا جاهزه عايزين نبداء دلوقتى حالا .
المصور الكاميرا جاهزه فى اى لحظه .
الصحفيه وانا كمان جاهزه وكل كلمه هتقولها هنزلها فى الصحافه .
المذيعه سيداتى .انساتى . سادتى .. نحن اليوم فى مكان حدث فيه احدى العجائب.
احدى الغرائب . احدى المعجزات سوف نرى معنا اعظم الشخصيات انه
ملك العرائس وما قدمه اليوم من اختراع جديد ... اختراع راهيب .ممكن
حضرتك تكلمنا حضرتك عن الاختراع دا .
البائع هو اختراع بسيط جدا ولكنه معقد جدا جدا .
الصحفيه طب ممكن تقلنا بالتحديد ازاى قدرت تعمل او بمعنى اصح... او بمعنى
اوضح قدرت تحول ..او بمعنى ادق قدرت تخترع عروسه وتخليها مغنيه
مشهوره كده .
البائع هو فى الحقيقه الاختراع ده خد منى وقت كبير جدا علشان اقدر اعمل ....
اختراع ....(تقاطعه الصحفيه)
الصحفيه برافوا.... برافوا .... حضرتك زكى جدا .
البائع اخترع عروسه معينه بمواصفات معينه واخليها مغنيه مشهوره ....
البنت انا عروسه...(باستغراب تذهب البنت امام الكاميرا) انا فى الحقيقه مش
عارفه اقول ايه ... انا بشكركم لانكم بتصورونى وانا طالعه فى التلفزيون.
المذيعه انتى مالك مرتبكه كده ليه اتكلمى براحتك خليكى فرى ... ايه شعورك
وأنتى مشهوره .
البنت مبسوطه ... مبسوطه قوى .
الصحفيه مش عارفه بس انا .....( اجزاء كومديه ليست لها علاقه بالمضوع)
المذيعه انا مش فاهمه حاجه ... انت فاهمه حاجه (للصحفيه)
الصحفيه ولا كلمه وحياتك .
المذيعه يا هانم .
البنت ما بلاش هانم دى ونرفع التكليف بنا .
المذيعه على العموم بعد ما اتكلمنا مع حضرتك عايزين نصورك وانتى لوحدك .
المصور انا عايزك تدينى احساس عارفه يعنى ايه ......... احساس يعنى احس
بالتصوير وانا بصورك .... انتى كده عروسه ملكيش لازمه .
البنت مليش لازمه ازاى .
المصور ادينى احساس انك عروسه ... ادينى شكل يوحى بانك عروسه ادينى اكتر
... واكتر ...كمان يا سلام على الاحساس هو ده بس كفايه ... كفايه ....
كفايه احساس... ودلوقتى انت نجمه مشهوره عايزك تدينى احساس انك
نجمه ادينى شكل بيوحى انك نجمه فهمانى ... نجمه ومشهوره يلا ادينى
اكتر واكتر .... كمان .... كفايه كده ... اتفضلى (للمذيعه)
المذيعه ممكن تقوليلى ... ولا اقولك انتى عايزه تقولى ايه دلوقتى .
البنت انا مشهوره مش عروسه .
المذيعه طيب تقدرى تقوليلى انتى مشهوره ليه ومش عروسه ليه .


البنت ( تصمت )
المذيعه على العموم نكتفى بالحوار وبنشكرك جدا على الحوار الجميل ده ونتمنى
نشوفك دايما مشهوره وعظيمه على طول .... فركش يا جماعه (يطلعوا).
البنت (تنظر ولا ترد)
البائع احنا اللى بنشكركم شرفتوا متشكرين جدا... الف مبروك يا مغنيتى
المشهوره .
البنت قصدك عروستك المشهوره .
البائع ايه الكلام ده يا .............
البنت تقدر تقولى ايه موضوع العروسه ده ........
البائع انا اقدر اقولك انك عندك حفله بكره فى باريس وحيهضرها كل مشاهير
العالم .
البنت انت مردتش عليا ..... انا بقيت عروسه .
البائع انتى بقيتى نجمه مشهوره .. الصحافه والتلفزيون والعالم كله بيتكلم
عليكى .
البنت بــــــــــــــس ..............
البائع حفله باريس بكره . ( ياخذها ويخرج)
(يفتح الستار الايمن على الولد وهو بيرسم لوحه غريبه)
البائع برافوا .... برافو .
الولد ( يرسم بطريقه كومديه )
مرقص الصحفين والمذيعين كسروا الدنيا بره يا فندم ادخلهم .
البائع دخلهم .( تدخل المذيعه والصحفيه والمصور)
المذيعه اعزائى المشاهدين اليوم يستضيف البرنامج احد العلماء العظماء الذين
قدموا اعظم الاختراعات .... من شويه قدمنا ليكم ازاى عمل من عروسه
لعبه مغنيه مشهوره ودلوقتى عمل من عروسه تانيه فنان عبقرى علمى
ذو حس مرهف ... ممكن تكلمنا عن اختراعك .
البائع فى الحقيقه الاختراع ده صعب جدا واخد منى وقت كبير جدا عشان اوصل
للنتيجه دى .
الصحفية طيب ممكن تكلمنا عن اخر مبدعاتك .
الولد أخر مبدعاتي الصورة دى مثلا فيها ......... و............... و ...............
المذيعه طيب ممكن تشرحلنا ال ........................ يعنى ايه .
الولد يبداء فى شرح الصوره
المصور يا سلام على الاحساس ... فيلم رومانسى يا ناس .... ادينى اكتر يا استاذ.
المذيعه طيب يا ترى قلبك هيقولنا ايه .
الولد قلبى هيقول حاجات كتيره ... كتيره قوى . (رومانسى)
المذيعه فنانا العظيم تقدر تقولنا انت سعيد فى حياتك ؟؟
الولد طبعا انا سعيد ... فنان عظيم ومشهور زى لازم يكون سعيد ثم انا ممكن
اكون سعيد ده لو اللى قدامى يحس بيا ويعرف ايه اللى فى قلبى .
المذيعه انا اسفه يا جماعه مش هقدر اكمل البرنامج .. عن اذنكم (تخرج)
المصور مش مهم اكمل انا ... طلع كل اللى فى قلبك انا معاك للصبح .
الصحفيه هسالك سؤال اخير .
الولد هو حد قالك متساليش .. المهم انه يكون سؤالك ذو حس فنى يكون طالع
من قلبك .
الصحفيه انت حياتك كلها كده مش وبس .
الولد انا قلبى بيقولى انى فنان ومشاعرى ملهاش حل .
الصحفيه انا بشكرك جدا يافناننا العظيم على الحديث اللى دار بينا.(تخرج)
المصور انا بقى مش ها قدر اسيبك غير لما تدينى احساس .. احساس بالفن
احساس بالحب..احساس ال..احساس بالحب ادينى الاحساس ادينى كمان..
كمان كفاية كدة. (تعبيرات حركية من الولد)
البائع اية الفن والاحساس والمشاعر دى كلها يافنان .
الولد مش عارف اقولك اية انت الوحيد اللى فاهمنى.بس انا عايز اقولك ان
الحياة عبارة عن لوحة واحساس.والاحساس بيجى من القلب ولما القلب
بيدق يبقى بيحس وكت دقة هتكون باحساس من القلب.
البائع اللة على الاحساس يافنان.
الولد الا.. قولى اية موضوع الاختراع والعروسة اللى هما كانوا بيتكلموا علية.
البائع ولاتحط فى دماغك..انت عرفت اخر لوحاتك اتباعت بكام.
الولد كانوا بيتكلموا على صح.
البائع اتباعت ب 120 الف دولار. (وياخذة من ايدة ويخرجة) اضاءة خافتة

مرقص (يدخل مرقص ويحاول الهرب) ايوة الفرصة جت هو دلوقتى اتلهى فى
عرايسة الجديدة انا عايز اهرب واروح لامى فى مدينة النور زمانها
مستنيانى انا لازم افك نفسى اقطع الحبال دى انا اتخنقت .. انا مخنوق.
(يحاول فك الحبال عند الدرجة الثانية (يتشد)الحبال تشدة)
مرقص انت مش عايز تسيبنى لية ..رابطنى لية . مش عايز تسيبنى لية .
البائع واسيبك لية.. انت مش مبسوط هنا.
مرقص انت اخدت توبى وخشبتى.
البائع واديتك الفلوس والشهرة.
مرقص حتى دول مش عارف اتمتع بيهم لانى مش حر مربوط.
البائع حر بس جوة مملكتى بس.. لكن تحاول تهرب لا.
مرقص بس انت قولتلى فى يوم من الايام هترجع لامك.
البائع شايفها مش هتسعدك.. ازاى م هتسعدنى.. انا اعرف احسن منك.
مرقص بس...
البائع من غير بس..متخلنيش اتعامل معاك بطريقة تانية.
.
مرقص انا هرجع للملك.
البائع انت كدة نرفزتنى(ويشدة)..انت ملكى (3)اوعى تحاول تهرب مرة تانية.
(يدخل الولد والبنت مقيدين بحبال)
الولد احنا بقينا .
البنت عرايس .
الولد احنا ازاى بقينا عرايس .... رد عليا يا مرقص .
البنت مرقص اختفى .
الولد مرقص كان لابس نفس الحبال اللى احنا لبسينها .
البنت احنا لازم نفك الحبال دى .
الولد انا مش قادر افكها .
البنت ولا انا .
البائع ومش هتقدروا تفكوها .
الولد انت باى حق تربطنا .
البائع مش انتوا اللى بعتوا .
البنت احنا بعنا التوب وال ............... الخشبه .
البائع انتوا بعتوا كل حاجه وأولها نفسكوا .
الولد أنت خدعتنا .
البائع انا مخصبتش حد .
البنت والحب اللى عطتهولنا .
البائع كان زمان .
الولد والآمال .
البائع أصبحت دخان .
البنت وأمنا .
البائع امكم نسيتكوا وسابتكوا .
الولد أمنا عمرها ما نسيتنا .
البائع امكوا ماتت .
الولد لالالالالالالالالالالالالا........ متؤلش أمنا ماتت .
البنت أمنا عمرها مهتموت .
البائع امال ايه اللى انتوا فيه ده .
الولد اللى احنا فيه ده .... احنا اللى اخترناه .
البنت وللاسف اخترنا غلط .
الولد بس احنا دلوقتى عايزين نرجع لملكنا .
البائع بس انتم خنتوا ملكم واجره الخطيه موت .
البنت ده صحيح .
الولد وايه الحل .
البائع الحل انكم تفضلوا معايا هنا معززين مكرمين مشهورين .
الام لا يا ولادى متسمعوش كلامه .
الاخوه امى .............. امى .
الولد مش قولتلك امنا مش هتسبنا .
الام يلا يا ولادى قبل ما الباب يتقفل .
(يجروا على السلم والحبال فى ايديهم)
البائع ايه انتوا نسيتوا ان انتوا خنتوا واجره الخطيه موت .
الام اوعوا تصدقوا ... فوقوا اصحوا ... افتكروا صوت الملك ... افتكروا الحب
اللى ادهولكوا .
البائع دى كدابه ... تقدروا تقولولى حد شاف الحاكم .
الأم انا مش هسيبك تخدعهم ... يلا يا ولاد ... قبل ما الباب يتقفل .
( يبدأوا يتحركوا ثم يشدهم البائع)
البائع اوعوا حد يتحرك انتوا دلوقتى عبيدى وتحت سلطانى ارادتكم خلاصكم
معايا .
الام اصرخوا... اصرخوا يا ولاد اصرخوا صرخه الم .. قبل ما الباب يتقفل
والصرخه تبقى صرخه ندم .
الاخوه مش قادرين .
البائع ولا هتقدروا ... انتم خلاص بيقتوا ملكى وتحت سلطانى ..انتوا دلوقتى
عبيدى .
الام ولادى مش عبيد ولادى احرار (تبكى) قوموا يا اولادى .
الولد مش قادرين .
البنت مش عارفين .
الولد والحل .
البائع (يتنرفز وشدهم) ولا هتقدروا .
الام الحل موجود ..... بس انتوا اللى مش شايفين انتوا اللى مش سامعين .
الاخوه مش فاهمين .
الام لازم تفهموا يا اولاد ... لازم تفتكروا ايه اللى ضاع منكم ... وايه اللى
بعتوه .
الولد توبى ... انا ضاع منى توبى .
البنت وانا بعت خشبتى .
الولد احنا لازم نفوق .
البنت لازم نرجع للملك .
البائع بطل الكلام ده .
الولد لازم نفوق .
البنت لازم نرجع للملك .
البائع انا ملكم .
الولد ملكنا فوق .
البنت ايوه ملكنا فوق .
البائع مش هتقدروا تفوقوا .
الولد مكنا مش هنا .
البنت وهنرجع لاصلنا .
الولد ملكنا بعتلنا .
البنت نوره منور قلبنا .
البائع هتبقوا خدامين هناك .
الولد وماله ما احنا اولاده .
الام ولادى كنتوا وحشنى قوى يا اولادى .
البنت امى الولد : امى
( يجروا ناحيه الباب فيغلق الباب)
الولد الباب مقفول يا امى ... معقول الباب اتقفل .
البنت احنا اتئخرنا قوى ....... احنا خلاص هنموت .
الام لا .... متقوليش كده .
الولد خلاص احنا خنا يا امى .
البنت وحكمنا الموت .
الولد كان كلامه صح .
الام عمره ما كان كلامه صح .
البنت امال ايه اللى احنا فيه ده .
الولد ايه اللى قفل الباب فى وشنا ... ايه السبب فين المفتاح .
الام انتو اللى قفلتوه ... المفتاح كان معاكوا .. انتوا اللى ضيعتوه شوفوا سبتوه
فين ... انتوا بتبوصولى .. روحوا دوروا عليه ... يلا يلا يلا ... يا اولادى
بسرعه قبل الباب ما يتقفل خالص ( ينزلوا ويبحثوا عن الخشبه)
الولد انا لقيت مفتاحى .
الام وانت يا بنتى .
البنت مش لاقياه يا امى ... تعالى دور معايا ... ( يدور معها فيجد المفتاح)لقيته.
الاخوه المفاتيح معايا يا امى .
الام يا فرحه قلبى....
( يتعرض لهم البائع فيحارب الولد البائع بأنتومين .. وبعد ذلك يسقط البائع
على الارض وتقع من خلفه عرايس خشب)
الام يا فرحه قلبى بولادى ... ولادى رجعولى .. يا فرحه قلبى .
( ستـــــــــــــــــــار